Madaxweynaha Bangiga Dhexe ee Jarmalka (Bundesbank), Joachim Nagel, ayaa walaac ka muujiyay kororka xisbiyada midigta fog ee Yurub, gaar ahaan kadib guushii doorashada ee xisbiga AfD uu ka gaaray gobolka Sachsen-Anhalt.
Nagel ayaa sheegay in kororka siyaasadaha xagjirka ah uu saameyn ku yeelan karo dhaqaalaha Jarmalka, maadaama ay abuuri karaan hubanti la’aan siyaasadeed oo saameyn karta maalgashadayaasha iyo shirkadaha caalamiga ah.
AfD ayaa si weyn uga soo horjeeda socdaalka, waxayna sidoo kale dhaliishaa Midowga Yurub iyo lacagta Euro-da. Qaar ka mid ah siyaasadaha xisbiga ayaa ku wajahan in la yareeyo xiriirka Jarmalka iyo Midowga Yurub.
Nagel wuxuu ka digay in haddii siyaasadaha noocaas ah ay sii xoogaystaan, Jarmalka uu lumin karo qayb ka mid ah soo jiidashadiisa dhaqaale iyo maalgashiga shisheeye.
Digniinta madaxa Bundesbank ayaa timid xilli Jarmalku wajahayo dood siyaasadeed oo sii xoogeysanaysa kadib guushii AfD ee Sachsen-Anhalt, taas oo dib u kicisay su’aalo ku saabsan socdaalka, dhaqaalaha iyo jihada siyaasadda dalka.
Dhanka kale, Madaxweynaha Bangiga Dhexe ee Yurub (ECB), Christine Lagarde, ayaa difaacday lacagta Euro-da, iyadoo sheegtay in taageerada Euro-da ay weli aad u sarreyso gudaha dalalka isticmaala lacagtaas.
Xigasho: Reuters
Leave a Reply