QUDUS — Madaxweynaha Israa’iil Isaac Herzog ayaa hoggaamiyaha mucaaradka Gadi Eisenkot u dhiibay fursadda koowaad ee dhismaha xukuumadda cusub, kaddib doorashadii baarlamaanka ee 27-kii Oktoobar oo aan dhinacna siin aqlabiyad uu kaligiis ku dhisi karo dowlad.
Isbahaysiga Ra’iisul Wasaare Benjamin Netanyahu ayaa doorashada ku waayey aqlabiyaddii uu hore u haystay, isaga oo kuraastiisu hoos ugu dhacday 53 kursi, halka mucaaradka uu hoggaamiyo Eisenkot uu helay 48 kursi. Xisbiyada Carabta ayaa iyaguna ku guuleystay 19 kursi.
Baarlamaanka Israa’iil ee Knesset oo ka kooban 120 xubnood ayaa u baahan ugu yaraan 61 kursi si loo dhiso xukuumad aqlabiyad leh.
Eisenkot ayaa haysta muddo lix toddobaad ah si uu wada-hadallo ula yeesho xisbiyada kale, uguna helo taageerada looga baahan yahay dhismaha xukuumadda. Waxa uu sheegay inuu doonayo hoggaan lagu kalsoonaan karo, u adeegaya danaha shacabka, isla markaana matalaya dhammaan bulshada Israa’iil.
Caqabadda ugu weyn ee hortaalla Eisenkot ayaa ah sidii uu taageero uga heli lahaa xisbiyada Carabta iyo xisbiyada diinta ku adag, kuwaas oo mid walba leh shuruudo siyaasadeed oo gaar ah.
Eisenkot ayaa sheegay in xisbiyada doonaya inay ku biiraan xukuumaddiisa laga doonayo inay taageeraan Israa’iil oo ah dal Yuhuudi ah oo dimuqraadi ah, adeegga milatari ama qaranka, iyo in Xamaas loo aqoonsado urur argagixiso.
Dhanka kale, Eisenkot waxaa horyaalla saddex ikhtiyaar oo siyaasadeed: inuu heshiis awood-qaybsi la galo Netanyahu, inuu taageero ka helo xisbiyada Carabta, ama inuu heshiis la gaaro xisbiyada Yuhuudda aadka u diinta ku adag.
Go’aanka Madaxweyne Herzog ayaa dhabar-jab kale ku ah Netanyahu, oo lumiyey aqlabiyaddii baarlamaanka. Si kastaba ha ahaatee, magacaabista Eisenkot weli ma xaqiijinayso inuu noqon doono ra’iisul wasaaraha cusub, maadaama ay weli socdaan loollanka iyo wada-hadallada lagu dhisayo isbahaysiga xukuumadda cusub.
Leave a Reply