Sanca — Wasiirka Difaaca dowladda Yemen, Sarreeye Guud Taher al-Aqili, ayaa raalli-gelin ka bixiyay hadal ka soo baxay wasaaraddiisa oo digniin u jeediyay dadka ku nool deegaannada ay maamusho kooxda Xuutiyiinta, kaas oo kulamada qabiillada iyo isu imaatinnada qaarkood ku tilmaamay bartilmaameedyo milatari oo sharci ah.
Al-Aqili ayaa Khamiistii, 22-ka Oktoobar 2026, qoraal uu ku baahiyay barta X ku sheegay in bayaankaasi yahay hadal aan la aqbali karin, isagoo raalli-gelin buuxda siiyay qabiillada Yemen. Waxa uu sidoo kale amray in baaritaan lagu sameeyo duruufihii keenay soo saarista bayaanka.
Wasiirku waxa uu caddeeyay in ciidamada qalabka sida ee Yemen aysan bartilmaameedsan doonin isu imaatinnada rayidka, isla markaana ay waajib ku tahay inay ilaaliyaan sharciga caalamiga ah ee bani’aadantinimada.
Waxa uu qabiillada Yemen ku tilmaamay qayb muhiim ah oo ka mid ah bulshada dalka iyo dadaallada lagu soo celinayo dowladda, isagoo xusay kaalintooda dagaalka ay kula jiraan Xuutiyiinta.
Raalli-gelinta wasiirka ayaa timid saacado kadib markii Wasaaradda Difaaca ay soo saartay bayaan uga digaya dadka ku nool deegaannada ay Xuutiyiintu maamulaan inay ka qayb galaan kulamada qabiillada, isu imaatinnada waaweyn iyo munaasabadaha dhaqanka qaarkood.
Wasaaraddu waxay ku eedaysay Xuutiyiinta inay kulamadaas uga faa’iidaystaan abaabulka carruurta iyo dhallinyarada, si loogu daro hawlgallada milatari. Bayaanka ayaa kulamada qaarkood ku tilmaamay bartilmaameedyo milatari oo sharci ah, taas oo dhalisay muran ku saabsan kala soocidda isu imaatinnada rayidka iyo hawlaha milatari.
Dhanka kale, Xuutiyiinta ayaa Sacuudi Carabiya ku eedeeyay inay hanjabaad u jeedisay kulamada qabiillada Yemen. Afhayeenka milatariga kooxda, Yahya Saree, ayaa ka digay cawaaqib uu ku tilmaamay kuwo aan la saadaalin karin haddii hanjabaadahaasi la fuliyo.
Hase yeeshee, Isbahaysiga Taageerada Sharciyadda Yemen ayaa beeniyay eedeymaha Xuutiyiinta. Afhayeenka isbahaysiga, Sarreeye Guud Turki al-Maliki, ayaa sheegay in sheegashooyinkaasi aysan sax ahayn, isla markaana ay marin habaabinayaan ra’yiga dadweynaha.
Isbahaysigu waxa uu sheegay in qabiilladu qayb muhiim ah ka yihiin bulshada iyo taariikhda Yemen, isagoo adkeeyay in Sacuudi Carabiya ay taageersan tahay amniga iyo xasilloonida dalka, isla markaana ay diiddan tahay in qabiillada loo adeegsado hurinta colaadaha.
Khilaafka ka dhashay bayaanka ayaa muujinaya xasaasiyadda ku xeeran doorka qabiillada Yemen, gaar ahaan xilli ay dalka ka jiraan iska horimaadyo milatari iyo loollan siyaasadeed oo u dhexeeya dhinacyada iska soo horjeeda.
Leave a Reply